Уюшган жиноятчилик ва коррупцияга доир суриштирувлар лойиҳаси эълон қилган маълумотга кўра¸ Малта кўчмас мулк регистрация ҳужжатлари унинг 1986 йили Тошкентда туғилганини кўрсатади. Боз устига¸ унинг асл фамилияси Гор эмас¸Гороховский бўлган.
Сержио Гор - иккинчи Трамп администрациясининг кадрлар бўйича асосий расмийси - Оқ уйдаги Президент кадрлар бошқармаси директори.
CNN гаплашган Оқ уй мулозимлари¸ Трамп администрациясининг деярли барча ходимлари президент олдига аввалдан белгиланган вақт ва тартибда кириши¸ фақат бу қоида икки одам - Илон Маск ва Сержио Гор учун мустасно эканини айтган.
Сержио Горнинг демократик партиянинг таниқли вакили¸ собиқ вице-президент Ал Горга алоқаси йўқ.
Сержио Гор ҳозирга қадар ўз ўтмишига оид оддий фактлар¸ масалан¸ айнан қайси давлатда туғилганини очиқлаган эмас.
У 2024 йил декабрида у Washington Post газетасига ўзини “малталик муҳожир” деб тақдим этган.
Бошқа бир Америка нашрининг айнан қайси давлатда туғилгани ҳақидаги саволига эса “Россияда эмас”¸ деб жавоб қилган.
39 яшар Сержио Гор ижро ҳокимиятидаги минглаб сиёсий лавозимга номзод танлайди¸ уларнинг ўтмишини текширади. Хавфсизлик чиғириғидан ўтганлардан қай бирини қайси лавозимга қўйишни Трампга тавсия қилади.
Сержио Гор ҳукумат йиғинларида одатда президет Трампнинг ëнида ўтиради.
АҚШ матбуотидаги маълумотларга кўра, 2008 йилдан бошлаб Республикачилар партияси сиëсий фаолиятида қатнашиб келган Гор Дональд Трамп командасига унинг ўғли орқали кирган. Сержио Гор Трампнинг тўнғич ўғли билан шерикликда Winning Team Publishing ширкатини таъсис қилиб¸Трампни мақтовчи китоб ва материаллар чоп қилган.
Трамп ҳукуматидаги 4000 дан ошиқ лавозимга номзодларни саралаш учун масъул бўлган Гор июнь ойида АҚШ матбуоти диққатига тушди.
Бунга икки нарса сабаб бўлди.
Биринчиси¸ Сержио Горнинг ўз ўтмишига оид энг оддий маълумотларни нафақат матбуот¸ балки АҚШ хавфсизлик тизимларига ҳам очиқламаëтгани.
17 июнь куни Нью Йорк Пост нашри Трамп ҳукуматидаги минглаб одам ўтмишини хавфсизлик нуқтaи назаридан текшириб чиқишга масъул одамнинг ўз ўтмиши тўлиғича текширилмагани ҳақида эксклюзив мақола чоп этди.
Нашрнинг уч нафар Оқ уй мулозимига таяниб ëзишича¸ ҳукумат лавозимига номзодларнинг барчаси хавфсизлик текширувидан ўтиш учун SF-86 деб номланган формани тўлдириши шарт. Бу формада нотўғри маълумот бериш ëки унга тўлиқ жавоб бермаслик қонунга кўра 8 йилгача қамоқ жазоси билан жазоланади. Аммо Трамп маъмуриятининг бош текширувчиси Сержио Горнинг ўзи 100 саҳифадан ортиқ бу саволларга жавоб бермаган.
Бу формани тўлдирган шахс¸ қасамëд остида¸ агар исми-шарифини ўзгартирган бўлса¸ аввалги исмларини очиқлаши¸ хориждаги оила -аъзолари¸ таниш-билишлари ҳақида тўлиқ маълумот бериши¸ хорижга қилган барча сафарларини¸ бошқа давлат фуқаролиги бор-йўқлигини ëзиб бериши шарт.
Бунақа ҳужжатни топширмаган одамнинг юқори лавозимга тайинланиши¸ Трампгача амал қилган қонун ва қоидаларга кўра¸ мумкин бўлмаган.
Нью Йорк Пост нашрининг ўз манбаларига таяниб ëзишича¸ Сержио Гор бу ҳужжатни тўлдирмаслик учун Трампни битта буйруқ билан 86-формани бекор қилишга кўндиришга уринган.
Горнинг бу ҳаракати кўпчиликка “бир балоси бўлмаса¸ шудгорда қуйруқ на қилур” нақлини эслатган.
Гор ўз ўтмишига оид саволларга жавоб беришдан бош тортишини “давлат ичидаги яширин давлат”¸ яъни ўз ғанимлари 86-формани қурол қилиб¸ Трамп сиëсатига қаршилик қилиш эҳтимоли билан изоҳлаган.
У ҳатто юристларни ишга солиб¸ АҚШ ҳукуматидаги юқори лавозимга тайинланиш жараëнидан SF-86 ҳужжатини тўлдириш талабини бутунлай бекор қилишга эришмоқчи бўлган. Гор¸ тегишли тизимларни президент Трамп ўзи хоҳлаган шахсни бундай хавфсизлик текширувисиз ҳам исталган лавозимга тайинлаш ваколатига эга эканига кўндиришга ҳаракат қилган.
Сержио Горни матбуот ва жамоатчилик назарига туширган иккинчи сабаб унинг Илон Маск билан кескин зиддияти бўлди.
Илон Маск ўзини Дональд Трамни иккинчи марта президентликка олиб келган асосий кучлардан бири деб билади.
Илон Маск Трамп Оқ уйга иккинчи бор президент сифатида қайтишида муҳим рол ўйнаган шахс.
У Трампнинг Оқ уйга қайтиши учун 300 миллион долларга яқин пул сарфлаган.
Трамп президентликка келиши билан Маскни Ҳукумат самарадорлиги департаментига раҳбар этиб тайинлади ва унга бутун ҳукумат идоралари бюджети ва штатини қисқартириш ваколатини берди.
Трамп иккинчи маъмуриятининг илк ойларида мамлакатни Илон Маск бошқаряпти, деган кучли эътирозлар туғилди.
Аммо Трамп ва Маск ўртасидаги биродарлик 3 июнь куни ниҳоясига етди¸ Маскнинг сиëсий қудрати ҳам тугади. Ижтимоий тармоқда бир-бирига очиқ ҳужумга ўтган Трамп ва Маск ҳозирда сиëсий рақибга айланди.
АҚШ матбуотига кўра¸ Трамп ва Маскнинг орасини бузган асосий шахс Сержио Гор бўлади.
Илон Маск Трамп ўз вазирлар кабинети билан 6 март куни ўтказган биринчи ҳукумат йиғинида¸ амал қилиб келган анъанага зид равишда¸ Илон Маск ва Сержио Гор ҳам қатнашган.
Ана шу йиғинда Маск Горни очиқча танқид қилган.The Washington PostОқ уйдаги манбасига таяниб¸ Сержио Гор бу танқид учун Маскдан ўч олиш ниятида эканини бошқалардан яширмаган.
Бу танқиддан кўп ўтмай¸ Гор НАСА раҳбарлигига Илон Маск таклиф этган номзодини ўтказмаган. Шундан сўнг¸ Оқ уйда кескин бўлиниш юзага чиққан. Гор Маскни Трампдан узоқлаштиришга эришган.
Бу тахминни Илон Маск ҳам билвосита тасдиқлади.
19 июнь куни X тармоғида Илон Маск New York Times мухбири постини улашди.
Трамп командасини саралашга масъул бўлган Сержио Гор доимий хавфсизлик текширувидан ўтиши учун шарт бўлган шахсий ўтмишига оид расмий ҳужжатларни тақдим қилмаган ва унинг ўз ўтмиши тўлиқ текширилмаган.
Бу постга Маск “у илондир”¸ деган ўз шарҳини қўшди.
Илон Маск Х тармоғида қолдирган шарҳ.
Ана шу икки воқеа билан тилган тушган Сержио Гор бекитиб келган маълумотнинг бир қисми 8 июль куни фош бўлди.
Уюшган жиноятчилик ва коррупцияга доир суриштирувлар лойиҳаси эълон қилган маълумотга кўра¸ СССР парчалангандан сўнг Горнинг оиласи Малтага кўчиб келган. 1994 йилги кадастр ҳужжатлари унинг онаси Лиля Гороховская Малтада компания очиб¸ унинг номига уй сотиб олганини кўрсатади. Ҳужжатда Гороховская Исроил фуқароси сифатида расмийлаштирилган.
Онаси вафотидан сўнг 2021 йили Гор айни уйни онаси компаниясидан ўз номига расмийлаштиради. Ана шу олди-бердида ўзининг Малтадаги бирламчи исми-шарифи ва туғилган жойи Тошкент¸ СССР эканини ëзади. Айни шу ҳужжат¸ Сержио Гор зўр бериб бекитиб келган сирнинг очилишига асос бўлди.
Уюшган жиноятчилик ва коррупцияга доир суриштирувлар лойиҳаси журналистлари 1996-1999 йилларда Гороховский Малтанинг Коспикуа шаҳарчасидаги мактабда ўқиганини тасдиқловчи ҳужжатларни ҳам топган. Коспикуаликлардан бири Гороховскийни аксарият “рус бола” деб билганини айтган.
Ўзининг айтишича¸ 12 ëшида ота-онаси билан АҚШга кўчиб келган.
Сержио Гор АҚШнинг Жорж Таун университетига ҳам Гороховский фамилияси билан ҳужжат топширган. Кўп ўтмай ўз фамилиясини Гор қилиб ўзгартирган.
Россия чегара хизматининг матбуотга сиздирилган ҳужжатлари¸ унинг Сержио Гор исми-шарифи билан 2017-2018 йилларда Москвага сафар қилганини кўрсатади. У Вашингтондан Аэрофлот билан Москвага учиб борган.
Сержио Горнинг адвокати Роберт Гарсон Уюшган жиноятчилик ва коррупцияга доир суриштирувлар лойиҳасига ўз мижозининг Тошкентда туғилганини тасдиқлаган, аммо бошқа саволларга жавоб бермаган.
Туғилган жойи¸ асли исми-шарифи¸ қолаверса¸ АҚШ президентлик сайловларига Россия махсус хизматларининг аралашуви жиддий тафтиш этилаëтган бир пайтда Москвага бориб-келганининг бекитилиши Сержио Гор ўтмишига нисбатан жиддий шубҳа туғдирмай қолмади.
9 июль куни Daily Beast нашри Сержио Горнинг Тошкентда туғилгани факти очиқлангани ҳақида ëзаркан¸ мақола сарлавҳаси остига қизил рангда "Товарищ" деган кўп маъноли сўзни қўшиб қўйди.
"Товарищ" сўзи америкаликлар учун СССР¸ коммунизм ва авторитар социалистик режимлар билан узвий боғлиқликни англатади.
У нега бундай оддий маълумотларни бу қадар яшириб келди¸ деган саволга турли тахминлар билдирилмоқда.
АҚШда яшаб келаëтган Рафаэль Сатторов Трамп кадрларининг қудратли қироли Сержио Горнинг асли ўзбекистонлик эканидан бу ердаги ўзбекистонликлар¸ хусусан¸ яҳудий диаспораси ҳам бехабар бўлганини айтади.
Унга кўра¸ Горнинг асли тошкентлик экани уни автоматик тарзда расмий Тошкент ва Вашингтон ўртасидаги кўприкка айлантирмайди.
Тошкент билан Вашингтон ўртасида боғловчи кўприклар жуда кўп. Лоббичи гуруҳлар¸ олигархик гуруҳларнинг ўзи ҳам етиб ортади. Элитанинг ўз каналлари юзага келган¸ диаспоранинг ўз каналлари бор. Бу шахс учун нафақат Ўзбекистон¸ балки бутун Марказий Осиë ўз аҳамияти бўйича юқори поғонада туради¸ деб ўйламайман. Бу одам тошкентлик экан¸ деб "ош дипломатияси"ни ишга солишга ҳожат йўқ ҳозир. Ўзи бу одам ош еб кўрганига ҳам ишонмайман", - дейди таҳлилчи Озодлик билан суҳбатда.